ललितपुर । दयाका हातहरु नेपालले एक दिने अभिभावकिय तालिम गरेको छ । गोदावरी नगरपालिका– ६, काफलडाडाँमा गोदावरी नगरपालिकाको स्थानीय संयोजन र ओर्फान्स प्रमिसको साझेदारीमा उक्त तालिम आयोजना गरिएको हो । काफलडाडाँका करिब ५० जना अभिभावकहरु यस तालिममा सहभागी भएका थिए ।
आफ्ना बालबालिकाहरुलाई कसरी हुर्काउने, उनीहरुलाई कस्तो व्यबहार गर्ने र उनीहरुको बौद्धिक स्तर कसरी बृद्धि गराउने भन्ने बिषयहरुमा प्रशिक्षण गराइएको थियो । बालबालिकाहरु विद्यालय जाने बितिक्कै परिवारका सदस्यहरूले उनीहरू प्रति राखेको तिब्र महत्वकांक्षाले मानसिक रूपमा पर्ने प्रभावको बारेमा छलफलका साथै प्रशिक्षण गरिएको थियो ।
उक्त तालिमका प्रशिक्षिका सुनिता तामाङ भन्नुहुन्छ, “बालबालिकाहरु विद्यालय गएको केही समयमा नै परिवारका व्यक्तिहरुले लेख्न र पढ्न नजानेको भनेर गाली गर्छाै यो गलत प्रवृति हो किनकि बालबालिकाहरु भर्खर सिक्ने क्रममा भएकाले उनीहरुले अक्षरहरु सहजै चिन्ह सक्दैन । जब कुनै बालबालिका विद्यालय जान्छन् त्यसको केही दिनमा नै उसलाई सबै पढ्न आउँछ भन्ने मनस्थिति परिवारले बनाउँछ भने त्यो बिल्कुलै गलत हो बिचार हो ।”
यस्तो तालिमहरुले बालबालिकाहरुको मनस्थिति अभिभावकहरूले बुझ्न सहायता गर्दछ । सन्तान प्रतिको महत्वकांक्षा एक तर्फबाट ठिक देखिएता पनि मनोवैज्ञानिक पक्षबाट बालबालिकामा असर परिरहेको हुन्छ । परियोजना संगोजक कृष्ण कुमार ठटाल भन्नुहुन्छ, “यस्तो तालिमहरुले बालबालिका र परिवारका सदस्यहरुबीच असल वातावरणको सृजना गरी बालबालिकाहरुलाई अझै असल तरिकाबाट अध्ययन गर्न र परिवारमा नै चौतर्फी विकासकासाथ हुर्कन मद्दत मिल्छ ।”
दयाका हातहरु नेपालले स्थानीय सरकारसँग समन्वय गरी आर्थिक स्थिति कमजोर भएको परिवारहरुलाई विभिन्न सीपमुलक तालिमहरुको संचालन गरी आर्थिक रुपमा सक्षम बनाउने सामाजिक कार्य गर्दै आइरहेको छ ।
प्रतिक्रिया दिनुहोस्